A Enxebre Orde da Vieira densenvolve este sábado 4 de marzo, en Madrid, o seu L Capítulo Ordinario, evento para o cal a Escola de Cantería da Deputación de Pontevedra elaborou un total de 18 vieiras de granito que se lles entregarán ás persoas distinguidas con este recoñecemento.

A Enxebre Orde da Vieira xorde no verán de 1967, con motivo do encontro, na praia de Panxón (Vigo), organizado por un grupo de persoas orixinarias de Galicia pero residentes en Madrid. Esta entidade ten o obxectivo de servir de punto de encontro á comunidade de galegas e galegos que viven na cidade.

Os Capítulos da Orde nos que se entregan os galardóns son, de acordo coa propia entidade, actos de exaltación da galeguidade e de reencontro das galegas e dos galegos da diáspora arredor dun tema establecido en cada convocatoria.

A asociación que preside Enrique Santín Díaz xa recoñeceu o importante labor cultural que desenvolve a Escola de Cantería entregándolle, no ano 2012, o Trofeo Galeguidade, na modalidade de persoa xurídica.