Detalle

A Escola de Cantería da Deputación elaborará os galardóns que lle entregará no mes de marzo, en Madrid, á Enxebre Orde da Vieira

03 de xaneiro de 2017

A Escola de Cantería da Deputación de Pontevedra elaborará un total de 18 vieiras de granito, que se lles entregarán, o próximo 4 de marzo de 2017, ás persoas distinguidas con este recoñecemento, durante a celebración do L Capítulo Ordinario da Enxebre Orde da Vieira, en Madrid.

A Enxebre Orde da Vieira xorde, no verán de 1967, con motivo do encontro na praia de Panxón (Vigo), organizado por un grupo de persoas orixinarias de Galicia pero residentes en Madrid; ten o obxectivo de servir de punto de encontro á comunidade de galegas e galegos que viven na cidade.

Os capítulos da Orde nos que se entregan os galardóns son, de acordo coa propia entidade, actos de exaltación da galeguidade e de reencontro das galegas e dos galegos da diáspora arredor dun tema establecido en cada convocatoria.

A asociación que preside Enrique Santín Díaz xa recoñecera o importante labor cultural que desenvolve a Escola de Cantería entregándolle o Trofeo Galeguidade 2012, na modalidade de persoa xurídica.